სიბერე არის მდგომარეობა, რომელიც ყველა ადამიანთან მოვა. მას ვერსად გაექცევით. მაგრამ ჩვენზეა დამოკიდებული, რამდენად მალე მოხდება ეს. მაგალითად, არის მავნე ჩვევები, რომლებიც ბევრი ჩვენგანის ცხოვრებაში ნორმალურად ითვლება, მაგრამ მათი გამორიცხვით შეძლებთ ახალგაზრდობის და კარგი განწყობის გახანგრძლივებას.
დეიდაჩემი 57 წლის არის, მაგრამ მაქსიმუმ 40 წლის ქალივით გამოიყურება. თინეიჯერობის წლებში ვკითხე, როგორ ახერხებდა ასეთი დიდებული ფორმის შენარჩუნებას, და საიდუმლო გამიმხილა. თურმე არსებობს მავნე ჩვევები, რომლებიც სიბერეს გვაახლოებს. მათზე უარის თქმით ახალგაზრდობა დიდხანს დარჩება თქვენთან. ამ რჩევებს დღემდე ვიცავ და ეფექტურად მუშაობს.
მავნე ჩვევები, რომლებიც ახალგაზრდობას ამცირებს
თუ ისტორიას გადახედავთ, შეამჩნევთ, რომ ახალგაზრდობის შესანარჩუნებლად ყოველთვის იბრძოდნენ. ხომ გახსოვთ ისტორიები კლეოპატრას რძის აბაზანების და მადამ დე პომპადურის სახის ნიღბების შესახებ? ქალები (ხანდახან კაცები) ცდილობდნენ, სიბერესთან შეხვედრის მომენტის გადადებას სხვადასხვა მეთოდით.
საბედნიეროდ, მეცნიერება დღეს უკვე ძალიან შორს წავიდა დაბერების პროცესის შესწავლაში. ახლა ვიცით, რომ ყველაზე ადრე ბერდება ჩვენი ტვინი და ხერხემალი. ამიტომ ძალა და დრო არ უნდა დაიშუროთ, რომ ამ ორგანოების ახალგაზრდობა რაც დიდხანს შეინარჩუნოთ.
სხვათა შორის, თანამედროვე კვლევები აჩვენებს, რომ ჩვენ რეალურად უფრო გვიან ვბერდებით, ვიდრე ჩვენი მშობლები და ბებიები. ამის მიზეზია ადამიანების ცხოვრების პირობების, კვების, ცხოვრების რიტმის შეცვლა. კოსმეტიკური ინდუსტრიის მდგომარეობაც შეიცვალა. ამ ყველაფრის დახმარებით ფიზიკურად უფრო ახალგაზრდები ვართ, ვიდრე ჩვენი წინაპრები იყვნენ. მთავარია, დავიმახსოვროთ, რომელ ჩვევებს აქვს დესტრუქციული გავლენა ჩვენზე.
სტრესი
ალბათ, გსმენიათ, რომ ყველა დაავადება ნერვებიდან მოდის. ამას გარკვეული ლოგიკა აქვს. როდესაც ვნერვიულობთ, ტვინი სიგნალს აძლევს სხეულს, რომ დროა გაქცევით თავს უშველოს. ამის შემდეგ სისხლში ხვდება დიდი რაოდენობით კორტიზოლი და ადრენალინი. შედეგად, სისხლძარღვები ვიწროვდება, ხოლო ტვინი ბერდება. ამ მდგომარეობაში ხანგრძლივი და ხშირი ყოფნა ორგანიზმს ცვეთას აიძულებს: ტვინი უარესად მუშაობს, ჩნდება ტაქიკარდია, მაღალი წნევა და მეხსიერების პრობლემები.
მიზეზის მიუხედავად ნერვიულობის თავიდან აცილება უნდა ისწავლოთ. მედიტაცია სტრესთან ბრძოლის ერთ-ერთი ყველაზე ეფექტური მეთოდია. არ დაგავიწყდეთ, რომ სტრესის ჰორმონი კორტიზოლი ფიზიკური აქტივობით საუკეთესოდ იხარჯება. სასარგებლოა როგორც დარბაზში ვარჯიში, ასევე გასეირნება. სუფთა ჰაერიც ჯანმრთელობას შეგმატებთ. ჯანსაღი ძილიც არ დაგავიწყდეთ!
მავნე ჩვევები
რამდენიც არ უნდა ვამტკიცოთ, რომ მავნე ჩვევებზე უარი უნდა ვთქვათ, ბევრი ადამიანი ამას უგულებელყოფს. სულ ტყუილად! ალკოჰოლის დალევა, მოწევა, უხარისხო კვება და სხვა არაჯანსაღი ჩვევები ორგანიზმის სწრაფად დაბერებას იწვევს. ამას ახსნა აქვს.
ჩვენს ორგანიზმში ყველა დაავადების, დაზიანების და ტრავმის შემდეგ აღდგენა უჯრედების აქტიური დაყოფით ხდება. მაგრამ ასე სამუდამოდ ვერ გაგრძელდება. თანდათან აღდგენის უნარი მცირდება. თუ 18 წლისას თრობის შემდეგ დილით თავს შესანიშნავად გრძნობდით, ასაკში ასე მარტივად ვერ გამოძვრებით. მავნე ჩვევებზე უარის თქმით ან მინიმუმამდე შემცირებით სიცოცხლეს რამდენიმე წლით გაიხანგრძლივებთ. არსებული წლებიც ხარისხობრივად გაუმჯობესდება.
მჯდომარე ცხოვრების წესი
თანამედროვე სამყაროში ბევრი ნაცნობი პროცესი გამარტივებული და ავტომატიზებულია, შედეგად დღის განმავლობაში ნაკლებს ვმოძრაობთ. განსაკუთრებით ეხება ოფისის თანამშრომლებს და მათ, ვისაც მჯდომარე მუშაობა უწევს. ეს კი ჩვენი სხეულისთვის უჩვეულოა. ევოლუციურად ისე მოხდა, რომ ადამიანს საკვების მისაღებად ჯერ ფიზიკურად უნდა ეშრომა. მჯდომარე მუშაობისას ტვინი იღლება, მაგრამ სხეული მინიმალურ დატვირთვას იღებს. შედეგად, კუნთები, ძვლები და სახსრები სუსტდება, ტვინი ბერდება.
თქვენს ყოველდღიურ რუტინაში აუცილებლად ჩართეთ ფიზიკური აქტივობები. მაგალითად, ჯგუფური ვარჯიში დარბაზში, ცეკვა, ცურვა, იოგა, კრივი და ა.შ. მაგრამ არა მხოლოდ სპორტია სასარგებლო. სამსახურის შემდეგ ან ლანჩის დროს ერთი საათით სიარული სხეულს ნაადრევი დაბერებისგან დაიცავს. თქვენთვის კომფორტული აქტივობა სასარგებლო ჩვევად აქციეთ. შედეგს ძალიან მალე დაინახავთ.
ემოციური და სულიერი აქტივობებიც არ დაგავიწყდეთ. ჩვენს ტვინს ახალი შთაბეჭდილებები რეგულარულად სჭირდება. ეს შეიძლება იყოს ახალი წიგნი და ფილმი, გამოფენაზე, კინოში, თეატრში წასვლა, მოგზაურობა და საინტერესო ადამიანებთან შეხვედრა. ასე ტვინს მუდმივად კარგ ფორმაში შეინარჩუნებთ.
