სამზარეულოს ნივთები ყველა დიასახლისის პირველი თანაშემწეა. რაც უფრო მეტი ნივთი გვაქვს, მით უფრო ადვილია ჩვენთვის ყოველდღიურ რუტინასთან გამკლავება. მაგრამ იმ პირობით, თუ სამზარეულოში არსებულ ნივთებს სწორად ვიყენებთ. ბევრი მოწყობილობა მწარმოებლების მიერ სრულიად განსხვავებულად იყო ჩაფიქრებული, ვიდრე ჩვენ ვფიქრობთ.
როდესაც მივლინებაში გასვლა მომიწია, მეგობართან დარჩენა გადავწყვიტე. სანამ სამზარეულოში ვსაუბრობდით, მეგობარმა საჭმლის მომზადება დაიწყო. ერთ-ერთი რეცეპტისთვის მთხოვა მთელი თავი ნიორი დამეჭყლიტა. როცა დავიწყე ნივრის კბილების ფურცლებიდან გაფცქვნა, მეგობარს გაუკვირდა. ამის გაკეთება საჭირო არ ყოფილა. როცა მეგობარმა საიდუმლო მაჩვენა, პირი დავაღე!
სამზარეულოს ნივთები, რომლებსაც არასწორად ვიყენებთ
გასაკვირია, მაგრამ თითქმის ყოველდღე ამ ნივთების უმეტესობას არასწორად ვიყენებთ. იმის ცოდნა, როგორ გამოიყენოთ სამზარეულოს ნივთები სწორად, საჭმლის მომზადების პროცესს უფრო კომფორტულს გახდის.
მაცივარი
მაცივრის მთავარი ფუნქციაა საკვების გაგრილება, მაგრამ ამ ტექნიკისგან მაქსიმალურ სარგებელს მხოლოდ სწორი გამოყენების შემთხვევაში მიიღებთ. მაგალითად, კვერცხს ტრადიციულად მაცივრის კარზე ვინახავთ. ეს კი შეცდომაა. პირველ რიგში, კარი ექვემდებარება ტემპერატურის მუდმივ ცვლილებებს გაღება-დახურვისას. ამის გამო კვერცხი გაცილებით სწრაფად ფუჭდება.
მაცივრის კარზე ხშირად ვინახავთ რძის პროდუქტებს, რაც არასწორია. პროდუქტები ჰაერის მიმოქცევით ცივდება, ეს პროცესი კი კარამდე ყველაზე ნელა აღწევს. შედეგად, პროდუქტი სწრაფად გაფუჭდება მისი მოხმარების ვადის მიუხედავად.
კიდევ ერთი პუნქტი, სადაც ბევრი ადამიანი შეცდომას უშვებს, მაცივრის გავსების დონეა. რაც უფრო ნაკლები პროდუქტია მაცივარში, მით უფრო სწრაფად გაცივდება. მაცივარი ბოლომდე არ გაავსოთ, რადგან ასე ჰაერის მოძრაობას ხელს უშლით, რაც პირდაპირ აისახება მოწყობილობის მუშაობის ვადაზე.
ჭურჭლის სარეცხი მანქანა
ჭურჭლის სარეცხი მანქანის მდგომარეობა მაცივარს არ ჩამოუვარდება. მთელი დღის განმავლობაში ჭიქების და თეფშების შეგროვება და შემდეგ მთელი მთა ჭურჭლის რეცხვა, კარგი იდეა არ არის. არ დაგავიწყდეთ, რომ წყალმა ჭურჭელს შორის თავისუფლად უნდა იმოძრაოს, რათა საპონი კარგად ჩამორეცხოს.
მნიშვნელოვანია, როგორ არის განლაგებული თეფშები სარეცხ მანქანაში. მწარმოებლები გირჩევენ, მაკარონის, კარტოფილის და ფაფის გამოყენების შემდეგ ჭურჭელი ცენტრში მოათავსოთ. მიზეზი მარტივია: ამ ადგილას წყლის წნევა უფრო ძლიერია და უკეთ რეცხავს ჭურჭელს მიხმარი ნარჩენებით. ხორცის, თევზის და რძის პროდუქტების ნარჩენები წინასწარ მოაშორეთ და ასეთი თეფშები მანქანის გვერდებში მოათავსეთ. ამ ნაწილში ხვდება ბევრი სარეცხი საშუალება და ცხიმიან ლაქებს უკეთ აშორებს.
სამზარეულოს კომბაინი სათქვეფით
თუ უნივერსალური სამზარეულოს კომბაინის იღბლიანი მფლობელი ხართ, იცით, რამდენად ამარტივებს საჭმლის მომზადების პროცესს. მაგალითად, სათქვეფის თავით თითქმის ნებისმიერი რამ შეგიძლიათ ათქვიფოთ. მთავარია, პოპულარული შეცდომა არ დაუშვათ. გახსოვდეთ, რომ სათქვეფის დამაგრების სიმაღლე პროდუქტების რაოდენობის მიხედვით რეგულირდება. თუ ძალიან დაბლა დაამაგრებთ, თასს დაკაწრავს. თუ ძალიან მაღლა დაამაგრებთ, პროდუქტებს არათანაბრად ათქვეფს.
ბლენდერი
ალბათ, ბლენდერი სამზარეულოს ერთ-ერთი ყველაზე პოპულარული დამხმარეა. მისი დახმარებით შეგიძლიათ მოამზადოთ სმუზი, კოქტეილი, სუპპიურე და ბევრი სხვა. მთავარია, ჭიქაში პროდუქტები სწორი თანმიმდევრობით ჩაამატოთ. ჯერ უნდა ჩაასხათ სითხე, როგორიცაა რძე, წყალი, წვენი ან ჩაი. შემდეგ მოდის პატარა პროდუქტები: კენკრა, კაკალი, თესლი. ამის შემდეგ ბლენდერში ხვდება რბილი ხილი და ბოსტნეული. სულ ბოლოს მაგარი და მძიმე ინგრედიენტები, როგორიცაა ყინული, ვაშლი, კიტრი და ა.შ.
ნივრის საჭყლეტი
თითქმის ყველა სამზარეულოში ამ ნივთს იპოვით, მაგრამ ცოტამ თუ იცის მისი სწორად გამოყენება. უმეტესობა ჩვენგანი დაჭყლეტამდე ნივრის კბილებს ასუფთავებს. მაგრამ შეგიძლიათ ეს არ გააკეთოთ. ნიორი ფურცლებიანად მოათავსეთ და დაჭყლიტეთ. ნივრის ფურცლები შიგნით დარჩება, ხოლო პატარა ნახვრეტებიდან ჩვეული ნივრის ფაფა გამოვა. ეს მომზადების პროცესს ამარტივებს!
ბოსტნეულის სათლელი
ვისაც უჭირს ხილის და ბოსტნეულის გათლა ჩვეულებრივი დანით, იყენებს ბოსტნეულის სათლელს. უმეტესობა ჩვენგანი ასრულებს მოძრაობას თავისკენ, როგორც დანით გათლისას. მაგრამ სწორი იქნება ქვემოდან ზემოთ მოძრაობა. ასე უფრო უსაფრთხოა და დაშავების ალბათობა მინიმალურია. გარდა ამისა, ბოსტნეულის სათლელი შეგიძლიათ გამოიყენოთ სხვადასხვა პროდუქტებისგან თხელი ნაჭრების და ბურბუშელას მისაღებად. მაგალითად, ყველის და შოკოლადის დასაჭრელად.
ჭურჭლის სახელური
დაკვირვებულხართ, რომ საჭმლის მოსამზადებელ ჭურჭელს სახელურზე ნახვრეტი აქვს? თურმე მას პრაქტიკული დანიშნულება აქვს. ნახვრეტი შექმნილია იმისთვის, რომ მასში ჩადოთ კოვზი, რომელსაც საჭმლის მოსარევად იყენებთ. ძალიან მოსახერხებელია, რადგან არ გჭირდებათ სპეციალური ქვესადგამის ან თეფშის აღება.
ხის საჭრელი დაფა
ალბათ, იცით, რომ ხის საჭრელი დაფა უფრო მოსახერხებელი და ეკოლოგიურია. მაგრამ ყველამ არ იცის, როგორ გაწმინდოს სამზარეულოს ეს ნივთი სწორად. გახსოვდეთ, ჭურჭლის სარეცხ მანქანაში ამ ნივთის გარეცხვა არ შეიძლება, ასევე ცხელ წყალში არ უნდა გარეცხოთ.
საჭრელი დაფის გასაწმენდად ლიმონის ნაჭერი და მარილი გამოიყენეთ. ჯერ ზედაპირს მარილი შეაზილეთ, რომელიც მთელ ჭუჭყს და სუნს შეიწოვს. შემდეგ დაფა ლიმონის ნაჭრით გახეხეთ, რომ ბაქტერიები მოკლათ. თუ ნივთს კარგად გარეცხვა სჭირდება, მხოლოდ გრილი წყალი გამოიყენეთ.
სპაგეტის კოვზი
სპაგეტი ერთ-ერთი ყველაზე პოპულარული გარნირია ჩვენს სუფრაზე, ამიტომ მისი სწორად მოხარშვა უნდა იცოდეთ. აქ სპაგეტის კოვზი დაგეხმარებათ. ცოტამ თუ იცის, რა ფუნქციას ასრულებს ეს ნივთი. კოვზი კბილებით და ცენტრში ნახვრეტით დამზადებულია იმისთვის, რომ ქვაბში მაკარონს ადვილად მოურიოთ, შეწებებაში ხელი შეუშალოთ.
კოვზში ნახვრეტს სხვა დანიშნულებაც აქვს. გამოიყენება ერთ ადამიანზე პროდუქტის რაოდენობის სწორად გასაზომად. აქედან გამომდინარე, სპაგეტის რაოდენობა, რომელიც ნახვრეტში ეტევა, არის ულუფა ზრდასრული ადამიანისთვის.
