ბევრ ჩვენგანს უყვარს შემწვარი თევზი. ის ძალიან მადისაღმძვრელია თავისი ოქროსფერი ხრაშუნა ქერქით. მაგრამ ნებისმიერი თევზის შეწვისას დგება უსიამოვნო სუნი, რომელიც სწრაფად ვრცელდება და შემდეგ ძნელად გადის. არც ასეთი წვრილი მოივაა გამონაკლისი. უფრო მეტიც, მისი ზომების გამო, ძნელია მისი დამუშავებაც. პაპარაცის დღევანდელ სტატიაში გაგიზიარებთ საიდუმლოებას, თუ როგორ უნდა მოაგვაროთ ყველა პრობლემა მოივას ტაფაში მომზადებისას.
მოივას მომზადება ტაფაში
მოივას ტაფაზე შეწვას დიდი დრო და ძალისხმევა არ სჭირდება. თუ ყველაფერს სწორად გააკეთებთ, თევზი ხრაშუნა გამოვა და არ დაიწვება. ეს რეცეპტი ბებიისგან მაქვს. მოივას ის ყოველთვის ასე ამზადებს. ყოველ ჯერზე მიკვირდა, როგორ გამოდიოდა თევზი ისეთი გემრიელი, რომ შეუძლებელი იყო გაჩერება, სანამ ბოლომდე არ შეჭამდი. ახლა მე უკვე ვიცი და ბებიაჩემის საიდუმლოებებს თქვენც გაგიზიარებთ.
ინგრედიენტები
- 1 კგ მოივა;
- 200 გ ფქვილი;
- 1 კარტოფილი;
- მარილი გემოვნებით;
- წიწაკა გემოვნებით;
- მცენარეული ზეთი შესაწვავად.
მომზადება
1.პირველ რიგში, კარგად გარეცხეთ თევზი გამდინარე წყლის ქვეშ. მოაყარეთ მარილი და პილპილი. ამ ეტაპზე ბევრი მარილი არ დაგჭირდებათ, რადგან მოგვიანებით კიდევ უნდა დაემატოს.
2. კარგად გახურებულ ტაფაში ჩაასხით მზესუმზირას ზეთი და მოაყარეთ მარილი. ეს აუცილებელია იმისთვის, რომ შეწვისას ზეთის შხეფები არ იყოს. ეს მარილი ასევე შეიწოვება მოივაში. ამის გამო, არ სჭირდება თევზს ბევრი მარილი დასაწყისში.
3. აიღეთ მშრალი პოლიეთილენის პარკი და ჩაყარეთ მასში ფქვილი. პარკში უფრო ადვილი და სწრაფი იქნება თევზის გაფქვილიანება. შეგიძლიათ პარკში ერთდროულად რამდენიმე ცალი მოივა მოათავსოთ.
4. ფქვილის ცელოფანი კარგად შეანჯღრიეთ ისე, რომ თევზი ყველა მხრიდან დაიფაროს ფქვილით. ნახავთ, რომ ეს მეთოდი ძალიან მოსახერხებელია, რადგან ფქვილი მთელს სამზარეულოში არ გაიფანტება, როგორც ჩვეულებრივ თეფშზე გაკეთების შემთხვევაში.
5. მოივა მოათავსეთ ტაფაში და შეწვით ოქროსფერი ქერქის მიღებამდე, პერიოდულად შეატრიალეთ. გარეცხეთ უმი კარტოფილი და დაჭერით წრეებად. რამდენიმე ცალი მოათავსეთ ტაფაში. ეს კარტოფილი ტაფიდან არ ამოიღოთ, შეწვით მოივასთან ერთად. ეს არის ზუსტად ის ხრიკი, რომელიც ხელს შეუშლის შემწვარი თევზის უსიამოვნო სუნის გავრცელებას მთელს სახლში.
6. კარტოფილის ნაჭრები პერიოდულად უნდა შეიცვალოს. ისინი არ უნდა დაიწვას, რადგან შემდეგ თავის თვისებებს დაკარგავს და სამზარეულოს უსიამოვნო სუნისგან ვეღარ დაიცავს.
7. მზა მოივა შეიძლება იყოს დამოუკიდებელი კერძი. ბებიაჩემი, მაგალითად, მას მზესუმზირას ნაცვლად მიირთმევს, სამზარეულოში ტელევიზორის ყურებისას. მაგრამ ასევე შესაძლებელია სენდვიჩების მომზადებაც, მწვანილთან ერთად.
ყველა ეს ხრიკი შეიძლება გამოყენებულ იქნას ნებისმიერი სხვა თევზისთვის და არა მხოლოდ მოივას მოსამზადებლად. ეს ხრიკები მნიშვნელოვნად გაამარტივებს პროცესს და თქვენს სამზარეულოში აღარ იქნება შემწვარი თევზის სუნი. შეწვისას, ზეთის შხეფებისგან დაიცავთ ტანსაცმელს და სამზარეულოს ზედაპირებს.
