„პაპარაცი“ გთავაზობთ ვარჯიშების ნაკრებს, რომლებიც ბოდიფლექსის ნაწილია. 5-ეტაპიანი სუნთქვის სისტემა გაიხსენეთ, რომელიც ჯანმრთელობის გაძლიერებას და წონაში დაკლებას უზრუნველყოფს.
საწყისი პოზიცია: სწორად დადექით, ფეხები 30-35 სმ სიგანეზე გაშალეთ, ტერფები პარალელურად. მუხლები ოდნავ მოხარეთ, მუხლებიდან 2,5 სმ-ზე ზემოთ ფეხებს ხელისგულებით დაეყრდენით (ცერა თითი და ხელისგული ბარძაყის შიგნითა ნაწილში, დანარჩენი გარეთ). ზურგი გამართული, ხედვა წინ მიმართული.
1-ელი ეტაპი: მთელი ჰაერი ამოისუნთქეთ. ტუჩებით მილის ფორმა გააკეთეთ და ნელ-ნელა და თანაბრად ჰაერი გამოუშვით, სახის კუნთები და დიაფრაგმა არ დაძაბოთ.
მე-2 ეტაპი: ტუჩები მოკუმეთ. ცხვირით სწრაფად და მკვეთრად („აგრესიულად“) ჰაერი შეისუნთქეთ. წარმოიდგინეთ, რომ წყლის ქვეშ დიდი ხანი იყავით და ახლა ჰაერის გადაყლაპვა გჭირდებათ. სწორი ჩასუნთქვის პროცესში დიაფრაგმა მონაწილეობს, გულმკერდი გააფართოვეთ, მხრები არ აწიოთ. ჩასუნთქვა ძალიან ხმამაღალი უნდა იყოს.
მე-3 ეტაპი: ფილტვები ჰაერით გაავსეთ, თავი ოდნავ ასწიეთ, ტუჩები უფრო მეტად მოკუმეთ, თითქოსდა მათ კბენას ცდილობთ. შემდეგ პირი ფართოდ და სწრაფად გააღეთ და ჰაერის გამოდევნა დაიწყეთ. ამასთან წარმოთქვით „პახ“ „პ-ხ-ხ!“ მნიშვნელოვანია, რომ სიტყვები ფილტვებიდან და მუცლიდან მოდიოდეს და არა ყელიდან. თუ ამოსუნთქვას სწორად შეასრულებთ, სტვენას გაიგონებთ. თავდაპირველად, შეიძლება ხველაც დაგაწყებინოთ.
მე-4 ეტაპი: მთელი ჰაერის ამოსუნთქვის შემდეგ პირი დახურეთ და სუნთქვა 8-10 წამით შეიკავეთ. ამასთან თავი დახარეთ და მუცლის ღრუს ორგანოები ნეკნებამდე ამოწიეთ. მუცელი შეწეული გქონდეთ და დაითვალეთ „ათას ერთი, ათასი ორი…ათას ათი“.
მე-5 ეტაპი: მოდუნდით, ჩაისუნთქეთ და მუცლის კუნთები მოადუნეთ. ჩასუნთქვა ღრმა იქნება, ჰაერი პირდაპირ ფილტვებში მოხვდება, შეიძლება მსუბუქი ქვითინის მსგავსი ხმა გაიგონოთ.
ხუთეტაპიანი სუნთქვის ათვისების შემდეგ შეგიძლიათ ეს სისტემა ვარჯიშებს შეუთავსოთ.
პირველ ვარჯიშს „ლომი“ ეწოდება და სახის კუნთების გაჯანსაღებას ხელს შეუწყობს. ასე კი ყელის და ნიკაპის აწევას და ოვალის გაუმჯობესებას შეძლებთ. ეს იოგის გაუმჯობესებული ვარჯიშია, რომელიც ასე შეასრულოთ: ამოსუნთქვის, ჩასუნთქვის, მუცლიდან ხმამაღალი ამოსუნთქვის შემდეგ საწყისი პოზა დაუყონებლივ მიიღეთ (ამასთან გასწორდით): ტუჩები პატარა წრეში მოაქციეთ, შესაძლებლობის მიხედვით თვალები ფართოდ გაახილეთ და ზემოთ ასწიეთ, ამავდროულად მოკუმული ტუჩები ქვემოთ დაწიეთ, ყელი და ცხვირის არე დაჭიმეთ, ენა კი რაც შეიძლება დიდზე გამოწიეთ. სახის კუნთები და ნიკაპი დაჭიმული უნდა იყოს. 8-მდე დაითვალეთ და ჩაისუნთქეთ. კვლავ საწყისი პოზა მიიღეთ და ვარჯიშის შესრულება დაიწყეთ. სულ 5-ჯერ გაიმეორეთ.
მეორე ვარჯიში სახელის „მახინჯი მანჭვა“ მიუხედავად ადამიანს უფრო ლამაზს ხდის და ორმაგ ნიკაპს აშორებს. მუცელი შეწიეთ და ქვედა ყბა ზედა ყბასთან მაქსიმალურად ახლოს მიიტანეთ, ტუჩები მოკუმეთ ისე, თითქოს საკოცნელად ემზადებით, კისერი დაჭიმეთ, თავი აწიეთ და ტუჩებით ჭერისკენ გაიჭიმეთ. წონასწორობა რომ დაიცვათ, იატაკზე ფეხებით მყარად უნდა დადგეთ, ხოლო ხელები უკან გაწიოთ. კისრის კუნთების დაჭიმვა უნდა იგრძნოთ. ვარჯიში 5-ჯერ გაიმეორეთ, თითოეულის შესრულების დროს 8-მდე დაითვალეთ. თითოეული ვარჯიში საწყისი სუნთქვის პოზით დაიწყეთ.
