იმისათვის, რომ მუდამ კარგ ფორმაში ვიყოთ, ყოველთვის ვერ ვახერხებთ დილაობით სირბილს, ან სპორტულ დარბაზში სიარულს. ზოგიერთს კი ფიზიკურ დატვირთვაზე უკუჩვენება აქვს. რა უნდა გავაკეთოთ იმისთვის, რომ შევინარჩუნოთ კარგი ფორმები და განწყობა? კომპლექსური ვარჯიშები სხეულისთვის ყველას შეუძლია შეარჩიოს თავისი ინტერესების და შესაძლებლობების მიხედვით. ხოლო იოგა – ეს არის უნივერსალური საშუალება სხეულის და გონების წესრიგში მოსაყვანად. დღეს paparazzi.ge გასწავლით რამდენიმე პოზას, რომელსაც ახალბედებიც თავისუფლად შეასრულებენ.

მთელი სხეულის ვარჯიშის კომპლექსი

იოგას მთავარი პრინციპია ბალანსის შენარჩუნება. როდესაც ცდილობ წონასწორობის შენარჩუნებას, კუნთები იჭიმება და მკვრივდება. სწორ კვებასთან ერთად მალე მიიღებთ მოქნილ და მკვრივ სხეულს, ხოლო იოგას სასარგებლო თვისებებზე უსასრულოდ შეიძლება საუბარი. მოდით, დავიწყოთ: იოგას ვარჯიშის შესასრულებლად უნდა შეარჩიოთ არა მცურავი ზედაპირი, ან დააფინოთ სპეციალური ხალიჩა.

მეომრის პოზა

1 . გამართეთ ზურგი და გააკეთეთ მარჯვენა ფეხით წინ ფართო ნაბიჯი, დაახლოებით ერთი მეტრი. მარჯვენა ფეხი მოხარეთ , ხოლო მარცხენა მაქსიმალურად გაჭიმეთ უკან, ეცადეთ ფეხის წვერებით შეეხოთ იატაკს. თუ გაგიჭირდებათ, მარცხენა ფეხი იატაკზე დააყრდენით და ისე შეასრულეთ.

2 . ჩასჭიდეთ ხელები ერთმანეთს, დაეყრდენით მარცხენა იდაყვით მარჯვენა მუხლს, ზურგი გამართეთ და იყურეთ ზემოთ.

3 . შეეცადეთ დაყოვნდეთ ამ პოზაში 30 წამი, ისუნთქეთ მშვიდად და შეინარჩუნეთ სწორი მდგომარეობა. უმჯობესი, თუ თავს სარკესთან გააკონტროლებთ. 30 წამის შემდეგ გაიმეორეთ იგივე მეორე მხარეზე. ამ ვარჯიშის შესრულების დროს მუშაობს თეძოს უკანა მხარე, იჭიმება ზურგის და მუცლის კუნთები.

სკამის პოზა

1 . დადექით სწორად, ფეხები ერთად დააწყვეთ. ჩაჯექით ისე, რომ მუხლით მიიღოთ მართი კუთხე. შემდეგ მენჯი უკან გაზნიქეთ, ხოლო ტანი გადახარეთ წინ.

2 . მარჯვენა ხელით შეეხეთ მარცხენა ტერფს. ხოლო მარცხენა ხელი გაჭიმეთ ზემოთ. თვალები ამართეთ მაღლა, ზურგი გამართულად, თეძოები კი იატაკის პერპენდიკულარულად.

3 . შეინარჩუნეთ ეს მდგომარეობა 30 წამი და შემდეგ შეცვალეთ მხარე. ამ დროს იჭიმება ზურგის კუნთები, ფეხები, თეძოები. ჩართულია მუცლის კუნთები და იმართება მკერდის ზონა.

კობრის პოზა

1 . დაწექით მუცელზე და დააწყვეთ ხელები თქვენს წინ. დაეყრდენით ხელის გულებს და აიწიეთ მაღლა.

2. ვარჯიშის გასართულებლად შეგიძლიათ ხელები სხეულთან ახლოს მისწიოთ და უფრო მეტად აიწიოთ მაღლა.

3 . ვარჯიში ავითარებს მკერდის ნაწილს, აუმჯობესებს დგომას. ასევე ეს პოზა ამაგრებს ზურგის კუნთებს, ხელებს, საჯდომის კუნთებს. შეასრულეთ ვარჯიში 30 წამი.

ვასიშტჰასანი

1 . დაეყრდენით გამართულ ხელებს. პრესი ამ დროს დაჭიმულია. გადაიტანეთ მთელი დატვირთვა მარცხენა ხელზე. ის უნდა იყოს ზუსტად მხრის გასწვრივ., ხოლო ხელის გული გაშლილი.

2 . მარჯვენა ხელი ასწიეთ მაღლა. ეცადეთ ამ პოზაში გაძლოთ 15 წამი მაინც, უმჯობესია მეტიც. შემდეგ გაიმეორეთ ვარჯიში მეორე მხარეზე.

3 . ეს პოზა ამაგრებს ხელის და ფეხის კუნთებს, მუცლის და მკერდის არეს.

შეასრულეთ ეს ვარჯიშები ყოველდღიურად. ამისთვის დაგჭირდებათ მხოლოდ 5 წუთი. სამაგიეროდ, თქვენი სხეული გაიღვიძებს და ენერგიით აივსება მთელი დღის განმავლობაში. პოზების დაწყებამდე სასურველია გააკეთოთ დაჭიმვები. ბოლოს აუცილებელია დაიმუშავოთ კუნთები, რათა არ გქონდეთ კრეპატურა.