რატომაა რთული ზედმეტი 2-3 კგ-ს დაკლება და რა მოვუხერხოთ მას

0
235

თუ ოდესმე გახდომა გიცდიათ და წონას აკონტროლებთ, ალბათ, გეცოდინებათ ისიც, რომ ხანდახან რთულია ზედმეტი 2-3 კგ-ს დაკლება. დღეს სასწორზე შეიძლება იდეალურ ციფრს ხედავდეთ, ხოლო ხვალ – პლუს 2 კილო. რატომ ხდება ასე და როგორ გამოვიდეთ ამ ჩაკეტილი წრიდან, ჩვენ ვკითხეთ სილამაზის ინსტიტუტ Le Colon-ის სხეულის სპეციალისტს, ვალერია ნასონოვას.

მისი თქმით, როცა წონის დიდი ნაწილი უკვე დაკარგეთ და დარჩა რამდენიმე ზედმეტი კგ (რომლებიც პლუს-მინუსში “ცურავს”), ეს ნორმალურია. ასეთი მოვლენა პლატოს დადგომის ნიშანია. ამ სიტუაციაში უნდა გადახედოთ კვებას, გაზარდოთ ფიზიკური აქტივობა (მაგ. მეტი იაროთ, ჩართოთ კარდიო-სავარჯიშოები), გამოიყენოთ სხეულის პროცედურები, რომლებიც ორგანიზმში მიმოცვლით პროცესებს აჩქარებს.

მოკლე ვადაში სტაბილურ წონას, დიდი ალბათობით, ვერ მოახერხებთ. 2-3 კგ-ს ორგანიზმი საკმაოდ სწრაფად იმატებს, ინახავს ცხიმოვან ქსოვილს, ხოლო გაცემით – ძალიან ნელა გასცემს. მხოლოდ ხანგრძლივი მიდგომისა და ცხოვრების ჯანსაღი წესის შედეგად შეიძლება სტაბილური წონის მიღება. მთავარია, არ გადაიჭრათ უკიდურესობაში, ექსტრემალური დიეტების სახით, დაიცვათ ცხოვრების ჯანსაღი წესი.

რამდენი კილოგრამის დაკლებაა თვეში ოპტიმალური?

წონის ოპტიმალური დაკარგვის ცხრილები კვირის ან თვის მიხედვით არ არსებობს, ყველაფერი სრულიად ინდივიდუალურია. თუ თავიდან ადამიანს დიდი წონა აქვს (100 ან მეტი), დაბალანსებული კვებისა და ფიზიკური დატვირთვების 1 კვირის თავზე, საკმაოდ ბევრ კგ-ს დაკარგავს. აი, თუ საწყისი წონა მცირეა (მაგ. 50-60 კგ), 10 კილოგრამზე მეტს ვერ დაიკლებს.

თუმცა, ნებსიმიერ შემთხვევაში, წონაში კლება უნდა ხდებოდეს თანდათან, ნებისმიერი მკვეთრი ცვლილება უდიდესი დატვირთვა იქნება ორგანიზმისთვის, ამიტომ ასეთებს უნდა მოერიდოთ. ექსპრეს-დიეტები ან ექსპრეს-პროცედურები, რომლებიც ერთბაშად 2 კგ-ზე მეტის დაკლებას მოიაზრებს, ნამდვილად არ ჯდება ჯანმრთელობის ჩარჩოებში. პირველ რიგში, ამას შეუძლია ჰორმონალური დარღვევების გამოწვევა. მეორეც, ორ დაკარგულ კგ-სთან ერთად, შეიძლება კიდევ 5 დაბრუნდეს. ამასთან, არაა გამორიცხული ჩამოწელილი კანის გაჩენაც.

როგორ დავიკლოთ ზედმეტი 2-3 კგ?

1. კვება

პირველ რიგში, ყურადღება კვებაზე უნდა გაამახვილოთ. ამისთვის გამოდგება დაბალანსებული რაციონი, რომელშიც ცილა-ცხიმ-ნახშირწყლების ოპტიმალური თანაფარდობაა გათვლილი, ასაკობრივი კატეგორიის მიხედვით. როგორც ზემოთ ვთქვით, უარი უნდა თქვათ მონოდიეტებზე, რომლებიც ორგანიზმს მხოლოდ ართმევს საჭირო მიკროელემენტებსა და ვიტამინებს. აი, მავნე პროდუქტის რაციონიდან ამოღება ნებისმიერ დროს შეგიძლიათ.

პროდუქტი, რომელიც მენიუდან უნდა ამოიღოთ:

  • შაქარი
  • რძის პროდუქტი
  • გლუტენი
  • ალკოჰოლი

პროდუქტი, რომლის მოხმარება უნდა შეზღუდოთ:

  • ყავა
  • შაქრის შემცვლელები
  • ხილი 12:00-ს შემდეგ

რაციონში უნდა იყოს დიდი რაოდენობით ბოსტნეული, უჯრედისი, საკმარისი რაოდენობით ცილა, “სწორი” სასარგებლო ცხიმები და მინიმალური რაოდენობის ნახშირწყლები. აუცილებლად დაიცავით სასმლის რეჟიმიც.

2. ფიზიკური აქტივობა

გაზარდეთ ფიზიკური აქტივობაც – დღეში არანაკლებ 10 ათასი ნაბიჯი გაიარეთ, ვარჯიშის გარდა. ამასთან, არ გადაიტვირთოთ, ანაცვლეთ ფიზიკური დატვირთვები დღეების მიხედვით: მაგალითად, ერთ დღეს შეასრულეთ კარდიო, მეორე დღეს – იოგა ან სტრეტჩინგი. საბოლოო ჯამში, არ იზარმაცოთ და მეტი იმოძრავეთ სახლშიც – სერიალის ცქერის ნაცვლად, იცეკვეთ, დაალაგეთ სახლი…

3. სხეულის მოვლა

არანაკლებ მნიშვნელოვანია სხეულის მოვლაც. შეგიძლიათ, ჩაეწეროთ სალონურ პროცედურებზე, საჭირო პროგრამას კოსმეტოლოგი ინდივიდუალურად შეგირჩევთ. კარგი იქნება საშინაო მოვლაც – ყველაზე სასარგებლოა სხეულის თვითმასაჟი ნატურალური ჯაგრისის ან სილიკონის ხელთათმნის გამოყენებით.

ყველაზე მთავარი რეგულარულობაა. თუ ყველა რეკომენდაციას ცხოვრების წესად აქცევთ, ჭარბი წონის პრობლემა გაქრება და არააქტუალური გახდება.