სტანისლავ ლინდოვერი ბოდიბილდინგის ოსტატი და ევროპის შემპიონია კლასიკური ბოდიბილდინგის კატეგორიაში. მან ზუსტად იცის, რა არის საჭირო იმისთვის, რომ ფორმა შეინარჩუნოს და ისე გამოიყურებოდეს, როგორც უნდა. თავის YouTube-არხზე მამაკაცი მაყურებელს სასარგებლო ცოდნას უზიარებს, საკვებისა და სპორტის თაობაზე. მისგან რამდენიმე რჩევა ჩვენც ჩავიწერეთ, ამიტომ დღეს კვებასთან დაკავშირებული საინტერესო ინფორმაციის დიდი ულუფა გელით.

სტანისლავ ლინდოვერი

მიღებული საკვების ხარისხი წონაში მატებისა და დაკლების გზაზე ერთ-ერთი საკვანძო ფაქტორია. მას კი მხოლოდ საკვების კალორიულობით ვაფასებთ. დღეს შეხვდებით მრავალ მზა ცხრილსა და აპლიკაციას, რომლებშიც უპრობლემოდ იპოვით ნებისმიერ პროდუქტს. მონაცემების დასაფიქსირებლად, სამზარეულოს სასწორი და ცოტაოდენი მოთმინება დაგჭირდებათ.

ბურღული და პარკოსნები მშრალ მდგომარეობაში უნდა აიწონოს. ხორცი და თევზი – ნედლი ან გამლღვალი. უნდა გესმოდეთ, რომ საკვების თერმული დამუშავება მას მოცულობაში ზრდის ან ამცირებს. თუმცა, ეს მის კვებით ღირებულებაზე არ ახდენს გავლენას.

უნდა ვისაუზმოთ თუ არა?

ლინდოვერი ამბობს, რომ საუზმე საჭიროა, თუ ორგანიზმი ითხოვს მას. ადამიანთა უმეტესობას მართლა უჭირს დილით საჭმლის მიღება, რაც ნორმალურია.

“ზოგადად, საკვების მოთხოვნილება, მეტწილად, დამოკიდებულია ცირკადული რითმების დონეზე. შიმშილის მაქსიმალური გრძნობა, რომელიც ჰორმონ გრელინის აქტივობის შედეგად ვლინდება, საღამოს 22 საათს ემთხვევა.” – ხსნის სპორტსმენი. ესე იგი, გასაკვირი არაა, რომ ჭამა ღამით ყველაზე მეტად გვინდება.

დილით კი, თავის მხრივ, გრელინი მინიმალური რაოდენობით მუშავდება. ამიტომ, საუზმობის სურვილი შეიძლება არ გაგვიჩნდეს. თუ თავს დილის ფაფის ან კვერცხის გარეშეც კარგად გრძნობთ, გადაწიეთ საკვების მიღების დრო დღის მეორე ნაწილისკენ.

საკვების მრავალფეროვნება

ითვლება, რომ რაც უფრო მრავალფეროვანია საკვები, მით უფრო მეტად გვინდება საკვების დამატებით მიღება. ამიტომ, გახდომის მსურველებმა რაციონში პროდუქტის სახეობების რაოდენობა მინიმუმამდე უნდა დაიყვანონ. ხოლო მათ, ვისაც წონაში მატება სურთ, პირიქით, რაოდენობის გაზრდას ვურჩევთ.

გლიკემიური ინდექსი

ეს კიდევ ერთი მაჩვენებელია, რომელსაც ახლა ყველა იცნობს. იგი სისხლში გლუკოზის დონის ფარდობით ცვლილებას გვიჩვეებს, ნახშირწყლებიანი საკვების მიღების საპასუხოდ. თითოეულ ადამიანში გლიკემიური რეაქცია განსხვავებულად მიმდინარეობს. ეს თავად საკვებზეცაა დამოკიდებული.

საქმე ისაა, რომ ცალკე აღებული პროდუქტის გლიკემიური ინდექსი მნიშვნელოვნად განსხვავდება მომზადებული კერძის ინდექსისგან. ლინდოვერის აზრით, ამ საკითხზე ჩაციკლვა უაზრობა იქნება. ეს საკითხი მნიშვნელოვანი მხოლოდ იმ ადამიანებისთვისაა, რომლებსაც ენდოკრინული სისტემისა და ნახშირწყლოვან მიმოცვლასთან დაკავშირებული პრობლემები აქვთ.

სხეულის მასის ცვლილებებს კი გლიკემიური ინდექსი სულაც არ განსაზღვრავს. ამიტომ, ნუ იტყვით კონკრეტულ პროდუქტზე უარს სამუდამოდ. მაგალითად, შაქარი ბევრში ისტერიკას იწვევს. რა თქმა უნდა, იგი კოვზებით არ უნდა მიირთვათ, თუმცა, მისი გლიკემიური ინდექსი გაცილებით უფრო დაბალია, ვიდრე კარტოფილისა.

საკვების მიღება დაყოფილად

ალბათ გაგიგიათ, რომ საკვების დაყოფილად მიღება მეტაბოლიზმს აჩქარებს. თუმცა, კვლევები ამტკიცებს, რომ არ აქვს მნიშვნელობა, დღეში სამჯერ შეჭამთ თუ ექსვჯერ. მეტიც, საკვების 2-3-ჯერ მიღება ოპტიმალური ვარიანტია ტონუსის შესანარჩუნებლად.

6-ის მერე ჭამა

ბოდიბილდერი თვლის, რომ 18:00-ის შემდეგ ჭამისგან თავის შეკავება დიდი სისულელეა. მას წარსულის გადმონაშთს უწოდებს. რა თქმა უნდა, გვიან ვახშამსა და ჭარბ წონას შორის შეიძლება იყოს კავშირი, თუმცა, ეს მხოლოდ იმ ადამიანებს ეხება, რომლებიც არაჯანსაღ, მაღალკალორიულ საკვებს მიირთმევს.

გარდა ამისა, სპორტსმენი ირწმუნება, რომ ღამით ჭამა არ გვასუქებს. ჩვენი ენერგოხარჯების თითქმის 70% შინაგანი ორგანოების მუშაობაზე მოდის, ისინი კი ღამითაც მუშაობენ, შესაბამისად…

გახსოვდეთ, რომ წონაში დასაკლებად მთავარი პირობა კალორიების დეფიციტია. არც ის დაგავიწყდეთ, რომ ნებისმიერი კვება დაბალანსებული უნდა იყოს. ჯანმრთელობას გისურვებთ!