გაზაფხულზე ყველას ერთი და იგივე პრობლემა აქვს: როგორ ჩავატიოთ გასუქებული გვერდები ტანსაცმელში, რომელიც გასულ წელს ყველა ღილზე თავისუფლად იკვრებოდა. ამისთვის უამრავი მეთოდი არსებობს, თუმცა, ჩვენ უკვე ბევრჯერ მიგანიშნეთ, რომ სპორტი სასწაულებს ახდენს. თუ ზომაში ცოტათი შემცირება გსურთ, Paparazzi.ge-ის რედაქციას თქვენთვის პილატესის საშინაო კომპლექსი აქვს.
მისი უპირატესობა იმაში მდგომარეობს, რომ ყველა სავარჯიშო ერთი იოგის ხალიჩის ფართობზე სრულდება. პრინციპი მარტივია – სავარჯიშოები ყოველდღიურად უნდა შეასრულოთ. ამისთვის თავში რაღაცამ უნდა დაიტკაცუნოს – ნებისმიერი მოტივაცია სწორედ იქ შენდება. ჩვენ იმედი გვაქვს, თქვენ მაინც გაგიმარტივდებათ. აბა, დავიწყეთ.
პილატესის საშინაო კომპლექსი
ჩვეულებრივ, ტრენერები ასე გვიტყუებენ: რთული არაა, დღეში 5 წუთი და ეგაა რა. ჩვენ კი გულწრფელად გეტყვით, რომ შედეგი მხოლოდ შრომას მოაქვს. საუბარი ოლიმპიურ ნორმებზე არაა, რა თქმა უნდა. თუმცა, არსებობს რამდენიმე წესი, რომლებიც თქვენს ცხოვრებაში ბევრ რამეს შეცვლიან. თუ გემოს გაუგებთ, შედეგსაც იხილავთ და უფრო რთულ პროგრამას აირჩევთ.
პილატესის სავარჯიშოები
1. თამასა
თავის მხრივ, თამასა სრულყოფილ სავარჯიშოდ ითვლება. თუ მას აქამდე აკეთებდით, შემდეგ კი შეეშვით, დააბრუნეთ იგი ყოველდღიური დავალებების სიაში. დადექით მაღალ თამასაზე, კორპუსი ცოტათი დაძაბეთ, სხეული კი სწორ ხაზად გაასწორეთ. ეცადეთ, ასე რაც შეიძლება დიდხანს გაჩერდეთ.
2. ალპინისტის თამასა
ჩვენი აზრით, ეს ვარიანტი გაცილებით უფრო მარტივია, ვიდრე უძრავი თამასა. დადექით მაღალ თამასაზე და მონაცვლეობით მოხარეთ ფეხები მუხლებში, ეცადეთ, მკერდამდე მიიტანოთ. ჯერ მარჯვენა, შემდეგ მარცხენა. გაიმეორეთ 5-6-ჯერ და დაისვენეთ. შემდეგ გააგრძელეთ. ასეთი 4 მისვლა მაინც უნდა გაიმეოროთ.
3. ფეხის გვერდული აწევა
თამასა დროებით გვერდზე გადავდოთ, დასაწყისისთვის ეს საკმარისია. ამისთვის ხერხემალიც გადაგიხდით მადლობას, მუცლის სწორ კუნთებზე რომ არაფერი ვთქვათ. დაწექით გვერდულად, თავი ხელს დააყრდენით. სხეული ერთ ღერძზე უნდა იყოს. თავიდან გაგიჭირდებათ წონასწორობის შენარჩუნება, თუმცა, დროდადრო მიეჩვევით. თუ მარცხენა მხარეს წევხართ, წამოწიეთ მარჯვენა ფეხი 45 გრადუსამდე. ფეხი მუხლში არ უნდა მოხაროთ. გაიმეორეთ რამდენჯერმე და შეცვალეთ პოზიცია.
4. წრე ფეხებით
აქ წონასწორობის შენარჩუნება საჭირო არაა, რადგან ზურგზე უნდა იწვეთ. გაშალეთ ხელები და დაიწყეთ ფეხების მონაცვლეობით წამოწევა (სასურველია 90 გრადუსით), შეასრულეთ ფეებით წრიული მოძრაობები საათის ისრის და მისი საწინააღმდეგო მიმართულებებით. შეასრულეთ რამდენიმე, არანაკლებ 6 წრე. ჯამში 3-4 მისვლა მაინც უნდა გამოგივიდეთ.
5. მაკრატელი
ეს ძველი სავარჯიშოა, ბავშვობიდან რომ ვიცნობთ. უბრალოდ, ამჯერად ფეხები მაღლა არ უნდა აწიოთ. საკმარისია, ისინი 45 გრადუსის დონეზე წამოწიოთ და ერთმანეთის ქვეშ შეაცუროთ. ასე კარგად ამუშავდება ქვედა პრესი და წელის კუნთები. გირჩევთ, მაკრატელი ყოველდღე გაიმეოროთ.
6. ფეხების წამოწევა
დაწექით ზურგზე და მაქსიმალურად მაღლა აწიეთ ორივე ფეხი ერთად. ისინი სწორად უნდა დაიჭიროთ, ხელები კი თავქვეშ უნდა გელაგოთ. გაიმეორეთ 5-6-ჯერ, ცერები გაასწორეთ და მაქსიმალურად მაღლა აწიეთ. დაისვენეთ და კიდევ რამდენიმე მისვლა გააკეთეთ.
7. პრესი
აქ საფიქრალი არაფერია. ეცადეთ, დაწოლილი წამოჯდეთ, ხელებისა და ფეხების გარეშე. ეს საკმაოდ რთული მისიაა, ფიზიკურად აქტიური ადამიანისთვისაც კი, ამიტომ თავიდანვე არ გამოგივათ. სამწუხაროდ, ასეთია გზა წარმატებისკენ. გზა იმისკენ, რომ მუცელი მკვრივი და ელასტიური, პრესი კი გამოკვეთილი გახდეს. ჩვენს შემთხვევაში, ამის მცდელობაც კარგია.
8. აზიდვები
დადექით ხელის გულებსა და მუხლებზე. ეს შეამცირებს კუთხეს და სავარჯიშოს შესრულება გამარტივდება (ცერების შემთხვევისგან განსხვავებით). ეს განსაკუთრებით ქალებს ეხება. გარდა იმისა, რომ მხრის სარტყელი ვარჯიშდება, საქმეში ერთვება მკერდისა და ხელების კუნთები. ეცადეთ, თავი სწორად დაიჭიროთ, სხეული სწორ ხაზს ქმნიდეს, როგორც თამასას დროს. საკმარისი იქნება რამდენიმე აზიდვა, შემდეგ კიდევ რამდენიმე მისვლა გააკეთეთ.
აირჩიეთ კვირაში რამდენიმე დღე და ივარჯიშეთ დღეჩაგდებით. რა თქმა უნდა, საუკეთესო შედეგს ყოველდღიური ვარჯიშით მიიღებთ. გადადგით რამდენიმე მტკიცე ნაბიჯი ახალი, უფრო ჯანმრთელი ცხოვრებისკენ.
